InicioPolíticaA Deputación de Lugo pediralle á Xunta que financie os seus centros...

A Deputación de Lugo pediralle á Xunta que financie os seus centros de maiores e os inclúa na súa rede de residencias

O goberno provincial, conformado por PSOE e BNG, levará a pleno unha proposta que reclama "modificar o modelo macrorresidencial" de Galicia. O PP de Lugo lembra que a Xunta "colabora" coas residencias da Deputación coas libranzas vinculadas.

PUBLICADA O

- Advertisement -

O pleno ordinario da Deputación de Lugo que se celebrará o vindeiro martes aprobará, previsiblemente, unha iniciativa do goberno –conformado por PSOE e BNG– para “reclamar á Xunta que asuma o financiamento dos centros de atención a maiores da institución provincial” e que os inclúa na rede pública autonómica de residencias.

Esta proposta, remitida aos medios polo Partido Socialista de Lugo, versa sobre “abrir un proceso de negociación” coa Administración galega para que asuma a xestión económica e loxística dos centros de atención provinciais, así como para “modificar o actual modelo macrorresidencial” co obxectivo de “fortalecer e consolidar unha rede galega de residencias públicas”.

O goberno da Deputación de Lugo lembra que “leva anos suplindo a inacción” do Executivo autonómico e “facendo un esforzo para achegar servizos sociais públicos, universais e de calidade aos veciños e veciñas da provincia”. Fan énfase en que a institución “dedica a políticas sociais aproximadamente un terzo do seu orzamento“, é dicir, uns 30 millóns de euros.

A proposta, levada a pleno por PSOE e BNG, afirma que “a pegada da pandemia do coronavirus nas residencias galegas amosou o fracaso do modelo de xestión privada impulsado pola Xunta“. Un modelo que, para o goberno de José Tomé, “está baseado na rendibilidade económica e non na calidade da atención”. “Segundo a Asociación Estatal de Directivos e Xerentes de Servizos Sociais, Galicia conta cun déficit de 14.902 prazas residenciais”, advirte.

DESENVOLVEMENTO RURAL

Socialistas e nacionalistas defenden o modelo residencial da Deputación lucense como “un factor de fixación da poboación e desenvolvemento para o rural“, xa que ademais de contar cun cociente que case asegura un coidador por persoa, xeran “máis 300 empregos directos e indirectos na contorna”.

Aínda así, recollen declaracións pasadas da Federación Galega de Municipios e Provincias (Fegamp) para visibilizar que “a administración local non pode asumir eternamente, sen financiamento adicional, as competencias que o Estatuto de Autonomía atribúe ao Goberno autonómico”.

PP

Pola súa banda, o  PP de Lugo lembrou que a Xunta “colabora” coas residencias de maiores da Deputación Provincial coas libranzas vinculadas e chamou a “deixar de politizar” con este colectivo, conformado por “as persoas ás que mais débeselle”.

Ante a moción de PSdeG e BNG, o PP mostrou a súa sorpresa xa que, segundo manifestou, o PSOE “critica” desde “hai anos” o modelo residencial da Xunta e”di que o da Deputación é mellor”.

Ademais, o PP de Lugo defendeu que a colaboración esixida a través da iniciativa reflíctese no feito de que o Goberno galego “colabora coas residencias de maiores da Deputación coas libranzas vinculadas”.

ÚLTIMAS

Obradoiros de coiro, cerámica e teares para celebrar os ‘Días Europeos da Artesanía’

A Vicepresidencia da Deputación de Lugo, a través da área de Artesanía, súmase á...

Coñecemos á ‘Galiartesá’, Pepa Lombao, oleira de Bonxe

O Galicia Confidencial presenta a serie 'Galiartesáns e galiartesas' coa que procura visibilizar diferentes oficios artesáns...

O Concello de Lugo defende que os recursos empregados no Ceao foron “suficientes”

A concelleira de Cohesión Social de Lugo, Ana González Abelleira, saíu ao paso das...

Bombeiros dá por extinguido o incendio no polígono de O Ceao e a Policía Científica inicia a súa investigación

Bombeiros de Lugo deu por extinguido este mércores o incendio que calcinou na xornada...