Novo contratempo de Vox ao seu paso por Galicia. Esta vez correu a cargo de Rocío Monasterio, que foi increpada aos berros de “Galicia non é verde” e “aquí están os antifascistas” nunha terraza situada no casco vello de Lugo. A líder de Vox na Comunidade de Madrid atopábase na cidade lucense con motivo dun mítin ao que acudira, xunto con Iván Espinosa de los Monteros, para prestar o seu apoio á cabeza de lista do partido ultradereitista pola provincia, Sonia Teijeiro.
Rematado o acto electoral, Monasterio e Espinosa de los Monteros dispuxéronse a cear nunha terraza do centro cando foron apupados por veciños da zona que rexeitaron a súa presenza ao berro de “fóra”, “aquí están os antifascistas” e ata parafraseando o lema de campaña do partido na frase “Galicia non é verde”.
Cando a parella se decidiu a abandonar o local, sucedéronse uns aplausos que Monasterio gravou en vídeo e logo publicou na súa conta de Twitter suxerindo que foran en apoio ó seu partido.
Os chíos en resposta á publicación de Monasterio non tardaron en aparecer. En contra do suxerido pola ultradereitista, os tuiteiros que a interpelaron defenderon dende o primeiro momento o carácter irónico dos aplausos e deixaron caer que Monasterio non os comprendera por non estar familiarizada coa “retranca” galega.
“Y la retranca esa como va? Es como sarcasmo no se si lo entiendo” Oie gayego, @VertoTemazos https://t.co/ga0Nvngj0A
— Iván Rodríguez (@ivan_piper) July 8, 2020
Pero que vos están vacilando! 😂😂😂 Mi madriña non vos enterades de nada eh?
— Xabier I Villares (@Xabier_Villares) July 8, 2020
Chámase retranca señora. Os galegos somos expertos nese arte.
— Mis Pepi (@miiss_pepi) July 8, 2020
Aínda que os escoltas da parella que integra a cúpula da formación esixiron a presenza da Policía Local os berros non foron a maiores.
