A Universidade de Santiago de Compostela incorporará o Muíño de Olga, en Lugo, á súa rede de espazos destinados á divulgación e á transferencia de coñecemento. O presidente da Confederación Hidrográfica do Miño-Sil (CHMS), José Antonio Quiroga, realizou a entrega simbólica das chaves do inmoble á reitora da institución académica, Rosa Crujeiras, como paso previo ao desenvolvemento de actividades científicas e formativas neste edificio.
A cesión materialízase ao abeiro dun convenio entre a CHMS e a USC e despois dos traballos de recuperación executados no recinto, cun investimento superior aos 790.000 euros.
Crujeiras destacou que a actuación permite combinar a conservación dun elemento vencellado á historia hidráulica da cidade cun novo uso universitario. “Este é un proxecto especialmente importante porque nos permite recuperar un elemento do noso patrimonio hidráulico e, ao mesmo tempo, darlle unha nova función ligada directamente ao coñecemento, á formación e á transferencia”, sinalou.
O inmoble naceu como un muíño hidráulico de río dotado de catro turbinas. Posteriormente funcionou como restaurante, unha transformación que, segundo a información facilitada, non modificou de maneira irreversible a estrutura arquitectónica orixinal.
O edificio distribúese en dúas plantas fsituadas por riba do nivel da auga e unha terceira baixo ese nivel, onde se conserva o circuíto hidráulico. A súa recuperación contou tamén cunha reforma promovida pola Escola Politécnica.
Tras a intervención, o Muíño de Olga dispón de máis de 360 metros cadrados acondicionados para acoller diferentes tipos de actividade. Entre os novos espazos figuran zonas destinadas a exposicións, así como unha sala situada na planta superior preparada para a celebración de charlas, encontros e reunións.
Esta dependencia conta con capacidade para máis de 40 persoas, o que permitirá á USC organizar no inmoble iniciativas de carácter científico e divulgativo abertas a diferentes públicos.
