A Deputación de Lugo e a Universidade de Santiago de Compostela (USC) renovaron este mércores a súa colaboración para desenvolver distintas actuacións no Campus de Lugo. A presidenta provincial, Carmela López, e a reitora da USC, Rosa María Crujeiras, formalizaron no Pazo de Montenegro dous convenios que permitirán financiar proxectos relacionados coa investigación, as infraestruturas universitarias, a divulgación científica e as prácticas do alumnado.
Segundo a información trasladada polas institucións, a Deputación achegará 370.500 euros, unha cantidade que representa máis do 80% do financiamento previsto nos acordos. A colaboración abrangue desde o funcionamento e conservación dos espazos universitarios ata programas para achegar a ciencia á sociedade e facilitar a transferencia do coñecemento xerado no Campus ao tecido económico e produtivo da provincia.
Crujeiras enmarcou os novos convenios nunha relación mantida durante anos entre ambas as institucións. A reitora destacou que a cooperación se sustenta “en la confianza y en la voluntad de colaborar, que queremos seguir fortaleciendo” e lembrou que a participación da Deputación se estendeu a ámbitos como as infraestruturas, a formación, a investigación, a cultura, o deporte ou a divulgación.
Para a responsable da USC, o apoio provincial tamén contribuíu á consolidación da presenza universitaria na cidade. “Lugo es hoy una ciudad universitaria, y la Diputación de Lugo tuvo mucho que ver con que esto sea así”, afirmou. Neste sentido, asegurou que a Universidade pretende manter “un Campus de Lugo fuerte, conectado con el territorio, capaz de generar conocimiento y de ponerlo al servicio de la sociedad”.
Pola súa banda, Carmela López defendeu o papel da universidade pública como elemento de igualdade de oportunidades e sinalou o Campus como un dos motores da provincia. A presidenta destacou especialmente a súa capacidade para atraer e manter talento, xerar actividade económica e trasladar innovación ás empresas, con particular incidencia no sector primario.
“Creemos en la educación pública, universal y de calidad como herramienta para garantizar la igualdad de oportunidades, y creemos que nuestro Campus es uno de los grandes motores de la provincia”, manifestou López, quen asegurou que a colaboración coa USC constitúe unha “apuesta fija” da institución provincial.
Actuacións nas instalacións universitarias
Un dos eixos dos acordos será o mantemento, conservación e reparación dos edificios e instalacións do Campus de Lugo e do Pazo de Montenegro, cunha partida indicada de máis de 200.000 euros.
Os traballos previstos abarcan diferentes elementos necesarios para o funcionamento diario dos centros, entre eles os sistemas eléctricos e térmicos, ascensores, redes de abastecemento de auga e saneamento, telecomunicacións e servizos relacionados coa xestión de residuos.
A colaboración tamén reserva recursos á divulgación científica e á transferencia de coñecemento, ámbitos para os que se recollen preto de 200.000 euros entre as actuacións detalladas. Neste apartado intégranse programas que permiten conectar a actividade universitaria co alumnado preuniversitario e co conxunto da sociedade.
Un dos proxectos que continuará contando con apoio é Xuvenciencia, o campus científico de verán que na súa pasada edición reuniu 95 estudantes chegados de diferentes puntos de Galicia. Tamén figura o Programa A Ponte, orientado a incrementar o contacto da USC cos centros educativos e, especialmente, co estudantado de Secundaria e Bacharelato.
A programación inclúe igualmente a exposición ‘Ciencia en Movimiento’ e actividades vinculadas ao Museo Universitario A Domus do Mitreo, situado en Lugo.
Apoio á investigación no Campus de Lugo
Os convenios contemplan ademais 24.000 euros para actividades de investigación e transferencia de coñecemento desenvolvidas desde estruturas científicas vinculadas ao Campus.
Entre os centros e iniciativas beneficiarias figuran o Instituto de Biodiversidade Agraria e Desenvolvemento Rural (Ibader), o instituto iTerra e a Estación Científica do Courel, tres estruturas desde as que se desenvolven proxectos relacionados, entre outros campos, co territorio, o medio rural, a biodiversidade e a investigación ambiental.
Os recursos permitirán tamén apoiar a mobilidade do persoal investigador que se atopa nas primeiras etapas da súa carreira e asumir gastos derivados de materiais, publicacións científicas, traballos de campo ou desprazamentos relacionados coa actividade investigadora.
40.000 euros para reforzar as prácticas
Outro dos apartados dos acordos está destinado directamente á formación do alumnado. A Deputación achegará 40.000 euros para ampliar as posibilidades de realizar prácticas, tanto na Granxa Gayoso Castro como noutras explotacións gandeiras e empresas asentadas na provincia.
A cooperación entre ambas as institucións permite que máis de 1.500 estudantes pasen cada ano pola Granxa Gayoso Castro, fundamentalmente alumnado da Facultade de Veterinaria e da Escola Politécnica Superior de Enxeñaría.
López destacou durante a sinatura a función formativa destas instalacións, que definiu como “un centro experimental único en el país”. Segundo explicou, permite ao alumnado acceder a experiencias prácticas que non sempre están dispoñibles durante a formación universitaria.
Ás actuacións incluídas nos convenios súmase unha achega de 9.500 euros para iniciativas relacionadas coa investigación tecnolóxica, a difusión de coñecemento no ámbito económico e social e a dinamización da propia comunidade universitaria.
COLABORACIÓN EN TERREOS E PLANIFICACIÓN MUNICIPAL
A cooperación da Deputación coa USC vai máis aló do financiamento de programas académicos e científicos. Ambas as institucións traballan tamén na actualización da Enquisa de Infraestruturas e Equipamentos Locais (EIEL), utilizada para coñecer a situación dos servizos municipais e detectar posibles desequilibrios entre os concellos da provincia.
A institución provincial mantén, ademais, a cesión gratuíta dos terreos ocupados polas facultades, centros de investigación e outros servizos educativos do Campus de Lugo, así como da parcela prevista para a futura Facultade de Formación do Profesorado.
