A Xunta de Galicia iniciou unha nova campaña arqueolóxica no Castro do Teso da Ermida, en Navia de Suarna, para continuar coa investigación e posta en valor deste conxunto de interese histórico e cultural, no que a Consellería de Cultura, Lingua e Xuventude leva investidos preto de 120.000 euros desde o ano 2020.
Segundo informa a Xunta, trátase dunha intervención cuxo obxectivo é mellorar o espazo de visita aos restos, ampliando e completando a escavación e creando un itinerario de mellor acceso e interpretación para o público que visite o xacemento arqueolóxico.
Deste xeito, os labores consistirán, entre outras, na investigación e documentación, mediante levantamento topográfico xeorreferenciado con fotogrametría 3D; na escavación con metodoloxía arqueolóxica dunha área duns 60 metros; no estudo pormenorizado dos materiais mobles recuperados, e en traballos de conservación e acondicionamento básico.
Ademais, inclúense accións de difusión entre as que se atopan unha visita guiada ao xacemento unha vez finalizada a actuación e unha conferencia e un vídeo divulgativo sobre o castro.
