A Rede Museística Provincial de Lugo (RMPL) recibiu unha emotiva homenaxe no Pazo de Tor con motivo do seu 20º aniversario, no marco do proxecto de investigación «Museos, Educación Histórica e Cultura Democrática. Retos sociais desde a interseccionalidade crítica», unha iniciativa que reúne preto dun cento de profesionais —investigadores, docentes e especialistas en museos— procedentes de 13 universidades españolas e dunha ampla representación de museos e institucións culturais de referencia.
Entre as institucións participantes figuran o Museo de Pontevedra, o Museo do Pobo Galego, o Museo de Belas Artes da Coruña, o Museo Arqueolóxico Nacional, o Museo Nacional do Prado, o Museo Nacional Thyssen-Bornemisza, o Museo Nacional e Centro de Investigación de Altamira, o Museo Nacional de Antropoloxía, o Museo Arqueolóxico de Alacante (MARQ), o Museo da Memoria de Andalucía, o Centro Andaluz da Fotografía, o Museo de Almería, os Museos de Terque, o Museo Íbero, o Museo do Realismo Español Contemporáneo (MUREC) e a propia Rede Museística Provincial de Lugo, da que forma parte Encarna Lago González, xerente da RMPL e integrante do equipo investigador.
Con motivo desta efeméride, 50 profesionais participantes no proxecto déronse cita no Pazo de Tor para render homenaxe á Rede Museística Provincial de Lugo, recoñecendo os seus vinte anos de compromiso cun modelo de museoloxía social, participativa e transformadora, convertido nun referente dentro e fóra de Galicia.
O acto central foi a conferencia «A Rede Museística de Lugo. Un exemplo de boas prácticas desde unha museoloxía social e transformadora», presidida por Cosme J. Gómez Carrasco, da Universidade de Murcia, quen pronunciou a laudatio en representación das universidades e institucións integrantes do proxecto.
Na homenaxe tamén interviñeron Ana Moreno Rebordinos, do Museo Nacional do Prado; Rufino Ferreras Marcos, responsable da Área de Educación do Museo Nacional Thyssen-Bornemisza; e José Manuel Rey García, do Servizo de Museos do Concello de Vigo, quen puxeron en valor o carácter pioneiro da RMPL, destacando a súa capacidade para situar ás persoas no centro da acción museística e para converter os museos en espazos de inclusión, participación, diálogo e construción de cidadanía.
Os participantes coincidiron en sinalar que a Rede Museística Provincial de Lugo constitúe hoxe un dos exemplos máis sólidos de museoloxía social en España, converténdose nun caso de estudo e nun modelo inspirador para profesionais, universidades e institucións culturais comprometidas co papel transformador dos museos.
O encontro concluíu cun recoñecemento colectivo á traxectoria da RMPL e ao labor desenvolvido durante estas dúas décadas por Encarna Lago e todo o equipo da Rede, reafirmando o seu papel como referente na innovación museolóxica, a educación patrimonial e a democratización da cultura.
