Onte coñeciamos a triste nova do abandono de seis cadelos nun colector de lixo en Lugo. Hoxe, a Asociación Animalista Libera e a Fundación Franz Weber pediron que o Concello de Lugo remita todas as súas investigacións á Fiscalía sobre este caso, o “enésimo” exemplo de malos tratos animais nos últimos meses.

Os cans foron rescatados con vida do interior do contedor, grazas á voz de alarma dunha parella que paseaba pola área recreativa de Doel. Este suceso súmase a unha serie deles que veñen causando preocupación en Lugo ultimamente. Ante esta situación, os animalistas urxen ao Concello tomar medidas máis drásticas, como pode ser o traslado das dilixencias ao fiscal especializado en Medio Ambiente na provincia lucense. E é que entenden que estes comportamentos poden constituír un delito de abandono animal, coa consecuente pena de multa de ata seis meses e a inhabilitación especial por un máximo dun ano “para o exercicio da profesión, oficio ou comercio que teña relación cos animais”

Por outra banda, estas asociacións tamén solicitan que se bote man doutra ferramenta xurídica: a comparecencia do Concello como acusación popular nos casos deste tipo que estean xudicializados. Coidan que iso amosaría un compromiso claro do goberno local coa política de ‘tolerancia cero’ cos malos tratos e o abandono animal.

Lembran que tamén existiría a vía administrativa, xa que a Lei de Benestar Animal de Galicia considera o abandono como unha infracción grave. Sancións de ata 5.000 euros e inhabilitacións similares ao Código Penal son as consecuencias que pode implicar. Con todo, Libera e FFW cren que a dificultade para identificar os autores converte os responsables en persoas practicamente impunes.

TRABALLAR ENTRE TODAS

Neste sentido, a mellor das solucións podería ser a concienciación cidadá respecto dun bo trato aos animais, así como a colaboración á hora de denunciar este tipo de situacións. O Concello podería colaborar neste aspecto, din os animalistas, con campañas educativas e de sensibilización.