A Plataforma pola Convivencia Ética coa Fauna Silvestre (Con-Ética) presentou unha denuncia perante a Fiscalía de Medio Ambiente para solicitar a supresión do protocolo de caza con arco do xabaril aprobado para a cidade de Lugo. A asociación ecoloxista indica que a utilización de métodos excepcionais carece de xustificación e de soporte legal, polo que a a Xunta de Galicia podería incorrer nun delito de prevaricación.
Con-Ética sostén que a aprobación do protocolo debía estar supeditada á elaboración dun informe cualificado, no que quedase xustificada a excepcionalidade e os métodos máis axeitados para o control da especie a controlar. A plataforma, porén, non ten constancia dese estudo, salvando o mapa coas zonas de desbroce e as goridas do xabaril. Así, consideran que sen o amparo técnico, a resolución do protocolo podería derivar nun delito de prevaricación. E inciden asemade en que a caza con arco “unicamente pode desenvolverse en en terreos cinexéticos sometidos a réxime especial”, pois a Lei de Caza de Galicia non contempla “excepción ningunha” para autorizar esta modalidade, e menos en zonas alén das faixas de seguridade urbanas.
Outras irregularidades denunciadas inclúen a autorización de captura fóra da tempada de caza, o “inxustificado uso de medidas letais no canto de preventivas”, que consideran perigosas para a cidadanía, “a inexistencia da valoración dos danos causados” polo xabaril, “ou a prohibición de caza de crías e femias con crías”.
O Goberno pronunciarase acerca da caza con arco do xabaril no Senado
