A mostra sobre Francesc Boix continuará unha semana máis no Vello Cárcere, ata o 3 de febreiro. Esta exposición describe o periplo do fotógrafo represaliado que axudou a documentar os horrores de Mauthausen, sendo unha testemuña fundamental na condena dos líderes do fascismo.
Dende a inauguración, o día 10 de xaneiro, a Asociación para a Recuperación da Memoria Histórica realizou homenaxes a todos aqueles republicanos lucenses deportados a campos de exterminio trala Guerra Civil, e concretamente, a Rafael Pardo Vales (do Corgo) e os irmáns Vitorino e Aurelio Díaz Hortas (de Outeiro). Este último foi o único dos tres que saíu con vida de Mauthausen.
A ARMH continuará asemade coas visitas guiadas. Os vindeiros martes e xoves, 29 e 31 de xaneiro, ás 19.00 horas, a historiadora María Paz Fernández acompañará aos visitantes da mostra.
A selección de imaxes, documentos e recompilacións históricas está acompañada do documental Boix, fotógrafo del infierno. Este traballo foi dirixido por Llorenc Adoitar, producido por Oriol Porta, e nel tamén participou o investigador Benito Bermejo. Documentado coas fotografías que Boix conseguiu rescatar, inclúe o testemuño deste represaliado nos xuízos de Nüremberg. Conta con varias distincións, entre elas o Premio do Festival de Cinema histórico de Pessac, Francia; e foi candidato aos Premios Emmy internacionais 2000.
A exposición poderase poderase visitar todos os días da semana só en xornada de mañá, de 11:00 a 14:00 horas os luns, e tamén en xornada de tarde, de 17:30 a 20:30 horas os martes, mércores e domingos; de 17:30 a 23:00 horas os xoves e venres, e de 17:30 a 22:30 horas os sábados.
