Podemos abre un proceso de primarias en once cidades e vilas de Galicia, co obxectivo de “reactivar” as estruturas locais. Ata o vindeiro 12 de novembro poderán presentarse os candidatos –con cadanseu documento político e organizativo– para liderar as distintas agrupacións. En Lugo será o caso de José Pérez, Josito, o actual voceiro local.
En Galicia, o partido ten aínda pendente a conformación das estruturas definitivas, pois os círculos constituídos a partir de 2014 foron quedando relegados por mor do funcionamento dispar dos grupos de traballo. Na cidade de Lugo, a agrupación mantivo un funcionamento paralelo á coordinadora de Lugonovo. Despois de abandonar este proxecto, o círculo lucense abanderou a creación dunha lista horizontal e con representación das catro provincias para acadar a secretaría xeral galega.
As primarias serán o primeiro dos procesos que abrirán en Podemos Lugo, nun plan que contempla a creación de redes colaborativas. Na formación entenden que a proximidade debe ser un valor diferencial, polo que despois da creación de secretarías e áreas procederán a incorporar a activos dos territorios e da sociedad civil. Este era o postulado dos círculos que o novo secretario xeral en Galicia asumiu logo de integrar á denominada terceira vía, entre os que se atopaba o propio Josito.
Aliás, o obxecto primordial é crear un proxecto “forte” e que aspire a gañar en Lugo, o único xeito de “cambiar as cousas”. En Podemos recoñecen que as primarias deben ser “un cambio de rumbo” e “outra marcha” de cara aos comicios locais de maio de 2019. Este “instrumento potente” incorporará a integrantes da candidatura de Carolina Bescansa. No círculo insisten: é tempo de acordo, de organización, e non de confrontación.
