O Concello de Lugo organiza este xoves, 11 de xuño, a conferencia “Deseñados con trampas: como o deseño dos videoxogos afecta á saúde mental”, unha actividade enmarcada no VII Ciclo de Adiccións sen Substancias que abordará unha cuestión de crecente actualidade: a relación entre o uso dos videoxogos e a saúde mental, así como o impacto que determinados elementos do seu deseño poden ter nos hábitos de consumo e comportamento das persoas usuarias.

A ponencia correrá a cargo de Juan Francisco Navas Pérez, profesor da área de Personalidade, Avaliación e Psicoloxía Clínica da Universidade Complutense de Madrid, investigador e autor de numerosos artigos científicos relacionados coas condutas adictivas e a psicoloxía aplicada aos xogos de azar. Ademais, é coautor de obras de referencia nesta materia, entre elas o libro Trampas.

A conferencia está dirixida especialmente á mocidade, familias, profesionais da educación e a todas aquelas persoas interesadas en coñecer mellor os mecanismos que poden influír no uso problemático dos videoxogos e as súas consecuencias sobre o benestar emocional.

A actividade terá lugar ás 18.00 horas no salón de actos da Casa do Saber da Universidade de Santiago de Compostela en Lugo. A entrada será libre ata completar a capacidade da sala. As persoas interesadas poden obter máis información no teléfono 982 297 498 ou a través da páxina web de Lugo +XTI.