A Audiencia Provincial de Lugo acolle este martes a segunda xornada do xuízo contra o acusado polo crime machista das Gándaras en febreiro de 2020. O home recoñeceuse como autor dos feitos, pero sostivo –na súa declaración deste luns– que el e a vítima, Clara Expósito, non eran parella.
Os feitos remóntanse a febreiro de 2020. A muller, de 49 anos, foi atopada morta na noite do día 7 no piso no que residía soa. O cadáver apareceu con feridas de arma branca no pescozo. O presunto asasino foi detido ao día seguinte como autor dos delitos de homicidio, violencia de xénero e violencia doméstica.
O avogado do acusado, Jacobo Vázquez, antes de entrar en sala, facía unha valoración “positiva” da declaración do seu defendido, que segue mantendo que non era parella da vítima. “Entendo que coas testificais estamos a acreditar o que queremos acreditar. Entendemos que non hai aleivosía e por tanto non hai asasinato, hai un delito de homicidio”, esgrimiu.
Vázquez, ante a confesión do seu cliente, puntualizou que “evidentemente el está moi arrepentido” e que “estaba baixo a influencia de bebidas alcohólicas e sustancias psicotrópicas”, o que “lle alterou a vontade de cometer os feitos que desgraciadamente cometeu”.
“TEN QUE SER CONDENADO”
Unha das acusacións particulares, Cristina Fernández, que representa a unha das fillas da vítima, expresou que “non” lle vale nin a confesión, nin o arrepentimento exhibido na súa declaración: “Ten que ser condenado polo que fixo e caerlle todo o que lle ten que caer coa lei da man”.
Seguidamente, estableceu que “é difícil negar o asasinato”. “Un pouco discútese o que son as agravantes como a aleivosía, que é o que cambia de homicidio a asasinato, a agravante de xénero, a agravante de parentesco e iso vai incrementando a pena”, explicou.
“Nas súas primeiras declaracións tentouno negar, pero agora tívoo que recoñecer (o luns) porque as evidencias son moi claras en canto a que cometeu o crime”, invocou. Todas as acusacións pídenlle 25 anos de prisión, nun xuízo que finalmente se podería estender ata o xoves. Na xornada deste martes prestarán declaración axentes da policía nacional que participaron na detención e a investigación deste crime machista.
