O Instituto Politécnico de Lugo conta cun novo espazo de 800 metros cadrados para albergar o ciclo de formación profesional en madeira despois dun investimento da Administración autonómica de 1,5 millóns de euros.
O conselleiro de Educación e Cultura, Román Rodríguez, visitou este mércores a nova instalación que se concluíu no Instituto Politécnico de Lugo. “É un salto cualitativo desde a perspectiva arquitectónica de usar a madeira como elemento estrutural e construtivo”, sinalou o conselleiro de Educación durante a visita.
Tamén deu conta dos investimentos do seu departamento en Lugo, e así debullou que este curso se puxo en marcha “o colexio do Sacro Corazón, cun investimento de 4,6 millóns de euros, e ampliación do colexio Muralla Romana, cun investimento de medio millón. Así mesmo, sinalou a ampliación no Politécnico e as obras no IES Sanxillao, cifradas en 1,8 millóns de euros e que se espera que estean listas antes de que conclúa o curso.
Ademais, anunciou que a Xunta “está pendente de licitar tres proxectos, xa non este curso académico senón este ano”. Trátase da rehabilitación integral do Instituto Lucus Agusti e do Ollos Grandes, actuacións ás que destinan 1 millón de euros. Román Rodríguez tamén avanzaba en canto a esas tres rehabilitacións, a que se acometerá no Instituto de Paraday cunha consignación dun millón de euros.
