O concelleiro Daniel Piñeiro compareceu este mércores no xulgado pola suposta comisión dun delito leve contra os recursos materiais. O responsable de Desenvolvemento Sostible de Lugo foi chamado a declarar pola situación do pozo de tormentas da Garaballa, que ocasionou verquidos de aguas fecais ao río Rato. A denuncia partiu do Servizo de Protección da Natureza (Seprona) da Garda Civil.

Tal e coma recolle GaliciaConfidencial, o edil socialista recoñeceu que a el compete todo o referente a medio ambiente na cidade, pero negou ter responsabilidade sobre as instalacións do barrio da Garaballa, que “estaban sen mantemento”. Piñeiro asegurou que dende o seu departamento tomaron “as medidas recomendadas polos técnicos” para paliar os efectos do mal funcionamento do pozo de tormentas, con labores de desatoamento diarias para limitar os malos olores.

Así, a defensa do titular de Desenvolvemento Sostible baseouse en que fixo “o que se podía facer” ata que se contratase o mantemento do pozo da Garaballa. “Iso son temas que non levaba”, comentou en referencia ao seu compañeiro no goberno local, o concelleiro de Infraestruturas Manuel Núñez.

A citación xudicial chega despois de que o executivo que dirixe Lara Méndez decidira intervir e xestionar directamente o pozo de tormentas, co que a instalación da Garaballa funciona con medios propios. Mediado o mes de maio, os técnicos municipais realizaron unha revisión na zona da vertedura. A instalación da Garaballa foi limpada e desbrozada, e posta de novo en funcionamento.

Segundo explicou entón o voceiro municipal, Miguel Fernández, os últimos episodios non estarían vencellados ao pozo de tormentas, polo que os responsables de mantemento comprobaron se existian atascos nos túneis. A hipótese é que unha treboada saturou o sistema de evacuación, pero polo de agora non haberá máis actuacións.

A solución definitiva, din dende o Concello, pasa polos pregos de contrato da Estación Depuradora de Augas Residuais (EDAR), que están “moi avanzados” e teñen tratamento “prioritario”. Ata que se contrate o mantemento do pozo da Garaballa, continuará a funcionar baixo responsabilidade do executivo socialista.

Unha vella polémica 

A polémica polas verteduras de augas fecais ao río intensificouse logo das tormentas da primavera, aínda que levaba anos sendo obxecto de debate na corporación. Na cerna da discusión, o estado do pozo de tormentas da Garaballa, sen mantemento por mor do contrato da xestión das augas, caducado e aínda sen renovar. O Bloque Nacionalista Galego levou en primera instancia o caso ao Seprona e a Confederación Hidrográfica, resultando en pequenas sancións económicas ao Concello.

A discusión tivo sempre como escenario a Comisión de Infraestruturas, eido que dirixe Manuel NúñezDebido á dilación na resolución deste problema de verquidos no río Rato, o BNG acudiu á Valedora do Pobo, que ata o de hoxe non se pronunciou o respecto. Quen si o fixo foi a Fiscalía de Medio Ambiente, conforme aos informes elaborados polos organismos da Xunta, e a denuncia do Seprona.

Como consecuencia da citación xudicial, o Partido Popular pedirá a reprobación do edil socialista no pleno de xullo, enmarcando esta solicitude na situación dos contratos de xestión das augas, a estación depuradora e a concesión da Fábrica da Luz. Pola súa banda, goberno local que dirixe Lara Méndez considera que o problema resolverase coas medidas xa adoptadas.