Axentes da Policía Local de Lugo tramitaron esta semana unha trintena de denuncias a outros tantos condutores que circulaban pola cidade cos seus vehículos a pesar das restricións impostas polo estado de alarma, decretado polo Goberno de España para frear a expansión do coronavirus.

Segundo informou este corpo de seguridade, axentes da Unidade Territorial de Policía de Barrio estableceron “diferentes dispositivos fixos e móbiles” na cidade nos últimos días e onte denunciaron a outros sete condutores.

Esas sete denuncias súmanse ás 22 que cursaran os axentes da Policía Local en diversas rúas de Lugo nos tres días previos a condutores que non acreditaron que a súa presenza na vía pública era debida a algún dos supostos autorizados. Os axentes cursaron as correspondentes propostas de sanción para cada un dos denunciados, con multas que van desde os 601 aos 30.000 euros.