O desabastecemento pola guerra de Ucraína comeza a notarse en Lugo

A Asociación de Distribuidores da provincia vén de saber que non recibirá aceite de xirasol, produto típico da área.

Agricultores traballando acompañados dun tractor / EP

A Asociación de Distribuidores de Lugo teme un posible desabastecemento de aceite de girasol pola guerra en Ucraína, e tamén de millo e cereais procedentes deste país. De feito, o presidente de Adislugo, Eloy García, advertiu que os provedores de aceite de xirasol que procede de Ucraína avisáronlles de que xa non dispoñen do produto. “Xa temos a circular de que non o imos a recibir”, declarou este mércores.

É por iso que terán que explorar outros mercados, como en Arxentina co “aceite de sementes de xirasol”, o que vai encarecer o produto e fará que “se disparen os prezos”. Tamén chama a atención sobre a incidencia en Lugo do “millo ou os cereais” que veñen de Ucraína, algo que vai “ter un custo importante” para este sector e “tamén para os gandeiros”.

A guerra e invasión de Rusia está a supor un problema para a distribución, nun momento que se empezaba a albiscar certo repunte en canto a facturación logo de dous anos “asfixiados” pola pandemia. Eloy García lembrou como “o pasado ano”, con respecto a índices de antes da pandemia que sitúa en 2019 “Os distribuidores facturamos un 26 por cento menos, e este ano roldamos o vinte por cento”, comentou. “O mes de xaneiro foi anómalo a nivel de hostalaría. Ademais agora co tema da enerxía e os combustibles que nos vai ao peto vaise a notar máis no noso sector”, subliñou.

Please wait while you are redirected...or Click Here if you do not want to wait.