O dispositivo de procura da muller de 52 anos desaparecida desde este pasado martes no municipio de Castroverde renovouse ás 9,00 horas deste xoves. Esa noite do martes, sobre as 22,00 horas, os familiares da muller denunciaron a súa desaparición ante a Garda Civil que este mércores pasado activou a súa procura.
O alcalde de Castroverde, José María Arias, precisou que ás 9,00 horas deste xoves se volveu retomar o rastrexo, sobre todo a zona máis próxima ao domicilio da desaparecida, no lugar de Barredo, que se sitúa na parroquia de Franceses de Abaixo.
Arias precisou que se reiniciou a procura con “cazadores, veciños e a Garda Civil”. “Imos volver dar unha pasada e estendela (a procura) máis lonxe para poder atopala e ver se é posible dar con ela”, sinalou.
A área de procura pivota nas inmediacións da “zona na que vivía”, insistiu o rexedor, que engadiu que se “está ampliando o radio da súa casa e amplialo e repasar o que xa se fixo onte (mércores)”. Finalmente, José María Arias constatou que é a primeira vez que esta veciña desaparece, á vez que apuntou que a familia está “bastante preocupada”.
