Natxo Lezkano, adestrador de Cafés Candelas Breogán, compareceu na rolda de prensa previa ao partido contra BAXI Manresa o domingo a partir das 12:30 horas no Nou Congost na décima xornada da Liga Endesa.
Lezkano valorou a rescisión de contrato de Tarence Kinsey: “Estaba a aportar pouco, sobre todo polas circunstancias das súas lesións, para a importancia que debería ter nun equipo como o noso un xogador estranxeiro. Estábase a perder moitos partidos. Precisamos un xogador que nos dé un pouco máis, que sexa un factor diferencial como teñen o resto dos equipos. Non lle importou marcharse. Probablemente non poidamos optar a un xogador determinante, pero sí importante”.
Sobre Manresa, opinou que “é un equipo que fixo as cousas moi ben, ten experiencia na categoría, ficharon a un moi bo adestrador, mantiveron unha base de xogadores LEB de moi bo nivel, con pernas frescas e ficharon xogadores de primeiro nivel e o están a facer moi, moi ben”, así como “un equipo moi sólido, moi físico, con moito talento, con moita confianza”, “todos nun bo momento na súa carreira”, “vaise salvar moi fácil e vai estar loitando por estar en zona de playoff”. Destacou individualmente a Alex Renfroe e a Ryan Toolson.
