Club Deportivo Lugo e Club Deportivo Pescados Rubén Burela Fútbol Sala anunciaron este mediodía un convenio para o “crecemento social, económico e deportivo” de ámbalas dúas entidades.
Mediante o acordo, estableceranse sinerxias, tales como accións de responsabilidade social, actos conxuntos, promoción de entradas e abonos, así como a creación do “Día de Burela” e “Día do C.D. Lugo” que permitirán aos abonados dos dous clubes ir a un partido de Liga no Ángel Carro lucense e no Vista Alegre burelense, unha peña do Club Deportivo Lugo en Burela e información común nas canles comunicativas oficiais dos dous clubes.
Tino Saqués, presidente do Lugo, declarou que ao Burela “non se lle da a importancia que ten” e “é importante que en Lugo lle demos importancia e sexa coñecido”. “Parece que do Fiouco para alá non hai nada porque realmente parece que a costa está alonxada da capital”, afirmou. Engadiu que “non é un convenio encriptado, senón aberto a máis opcións”.
Manuel Blanco, presidente do Club Deportivo Pescados Rubén Burela F.S., afirmou que “é xuntar Lugo e A Mariña” e subliñou que queren crear unha peña do Club Deportivo Lugo en Burela.
Ademáis, Tino Saqués respondeu que, a nivel deportivo, co cambio de adestrador “estase a notar un cambio sustancial no xeito de xogar, en ir a polos partidos”, así como un “fútbol diferente e gañador”.
“Se aparecen oportunidades nalgún posto que pensemos que é preciso evidentemente poderemos facer uso”, respondeu o presidente albivermello sobre o mercado de fichaxes en xaneiro.
Saqués recoñeceu tamén que a afluencia de espectadores “baixou considerablemente con respecto ao ano pasado”.
Sobre a academia deportiva de San Fiz, espera que “cedo” teñan a “cesión dos terreos”, pero “non hai unha data”. Para esta cesión, precisan unha fundación e están “co trámite”.
