O porteiro lucense Ignacio González Almuíña “Illi” renova con O Parrulo Ferrol Fútbol Sala, equipo de Primeira División, por unha tempada, segundo confirmou o club. O acordo asinouse esta mesma mañá. O xogador lucense, de 26 anos, cumprirá a súa cuarta tempada no Parrulo, co que acadou o ascenso a Primeira en 2017 e a permanencia na máxima categoría este 2018.
“Illi” xogou 34 partidos a pasada tempada. Segundo o club, “o seu xeito de xogar e o seu carácter sobre a pista e fóra dela valéronlle para ser un dos xogadores máis queridos por tódolos afeccionados e afeccionadas de O Parrulo Ferrol”.
Previamente, formouse no Azkar Lugo F.S. e xogou no seu primeiro equipo entre 2010 e 2015, sempre en Primeira División. Co Azkar, foi campión da Copa Xunta de Galicia en 2013.
“Illi” foi campión de España cadete coa selección galega.
O Parrulo Ferrol F.S. está adestrado polo técnico lucense Diego Ríos. O peche lucense Diego Núñez renovou co equipo o pasado 18 de xuño.
