Uns 40.000 afeccionados, segundo as previsións do goberno da Deputación de Lugo, desprazaranse esta fin de semana para presenciar en directo as distintas etapas da cuadraxésimo primeira edición do Rally San Froilán, que contará coa participación de 129 equipos e pilotos.

Durante a presentación do rally, cuxa organización corre a cargo da Escuadra Miño, os seus promotores informaron de que hai trinta equipos máis rexistrados que na pasada edición e que 450 persoas colaboran para que esta proba deportiva volva transcorrer en condicións de seguridade.

A proba, que se disputa entre os días 25 e 27 de outubro, pasará polos municipios de Lugo, Outeiro de Rei, Meira, Friol e Pol, cun percorrido total de 379 quilómetros, dos que 91,3 se corresponden cos oito tramos cronometrados por estradas asfaltadas pechadas ao tráfico.

A subdelegada do Goberno, Isabel Rodríguez, que participou na presentación xunto a outras autoridades locais, fixo un “chamamento” aos pilotos, pero sobre todo ao público, “para que sexa respectuoso coa sinalización e atenda ás indicacións do persoal de seguridade”.

Ademais, lembrou que tanto a Policía Nacional como a Garda Civil despregarán un dispositivo especial para garantir a seguridade da proba.