A función terapéutica da cultura faise un oco no cárcere de Monterroso. Alí levarase a cabo o proxecto de teatro ‘Saír, por un intre’, coa colaboración do Centro Penitenciario e a área de Cultura da Deputación de Lugo.
A actividade comezou a programarse no ano 2016 na unidade terapeútica, un módulo específico no que se traballa coas persoas no abondono do consumo de drogas. A vicepresidenta provincial, Maite Ferreiro, destaca que o proxecto “dá a oportunidade de incrementar o acceso á cultura para a poboación reclusa, con todo o que iso aporta ao desenvolvemento integral da persoa”.
“Acreditamos na cultura como dereito, como ferramenta de transformación social, con capacidade para educar, para xenerar experiencias vitais gratificantes e establecer vínculos e canles de comunicación entre as persoas”, engadiu. Así mesmo, lembrou o compromiso que deben ter as administracións públicas coas persoas internas porque “non debemos esquecer que a finalidade das penas de privación de liberdade é reinserción e a reeducación”, argumentou.
O proxecto teatral “Saír, por un intre adiante” enmárcase no Plan de Animación Sociocultural que desenvolve a asociación Aliad Ultreia en colaboración co Grupo de Investigación en Pedagoxía Social e Educación Ambiental da USC. Tras catro anos de actividade voluntaria, a continuidade e a consolidación do proxecto, que tivo desde o inicio unha moi boa acollida tanto por parte das persoas internas como do equipo terapéutico, requería do financiamento que agora achega a área de Cultura.
FUNCIÓN PARA OS FAMILIARES
O obradoiro, que se desenvolverá de outubro a xaneiro durante dúas horas á semana, xirará en torno ao xogo e a imaxinación, fomentando unha actitude positiva fronte á adversidade. Na actividade participarán profesionais doutras disciplinas como a música ou os títeres para que a montaxe fique o máis completa posibles tecendo así unha rede cultural e interdisciplinar. Está prevista tamén unha mostra final do espectáculo no salón teatro do centro penitenciario ao que acudirán os familiares dos internos.