A cidade da Muralla xa comeza a súa andaina de preparación para unha nova edición do Arde Lucus. Castrexos e romanos tomarán as rúas o último fin de semana de xuño, pero o traballo comeza moito antes. E, neste caso, en Madrid. Alí estase a celebrar Fitur 2020, a gran feira de turismo internacional. Representantes do Concello acudiron á capital estatal para presentar o Arde Lucus e procurar unha maior proxección internacional.
Este xoves 23 de xaneiro, a alcaldesa, Lara Méndez, e a edil de Xuventude, Ana González Abelleira, presumirán desta festa xa catalogada de Interese Turístico Nacional. Farano a través dun vídeo promocional editado en cinco idiomas: galego, castelán, inglés, francés e chinés. O obxectivo non é outro ca o de “atraer turismo estranxeiro” e incrementar a “pegada” de Lugo na China, “país co que nos unen moi boas relacións derivadas do irmandamento entre Murallas que mantemos dende o 2007″.
Ana González Abelleira cualificou Fitur como “un escaparate inmellorable” para dar a coñecer esta celebración. Proxectarase un vídeo baseado en imaxes reais, gravadas na propia cidade. “Reflicte á perfección o espírito e a esencia destas festas”, comentou a edil de Xuventude.
CAMPAÑA ‘LUGO KM 100’ E ‘PARA COMER, LUGO’
O Concello de Lugo tamén promocionará en Madrid a campaña ‘Lugo km 100’, coa que se pretende poñer en valor a cidade e os diferentes Camiños de Santiago que discorren polo termo municipal.
Pola súa parte, a Deputación de Lugo presentará a campaña ‘E para comer, Lugo’, da Asociación de Hostaleiros.