A asociación cultural Avelino Díaz recollerá sinaturas ata o día 28 de abril coa fin de que a Real Academia Galega (RAG) adique o Día das Letras Galegas ao poeta do mesmo nome. Os interesados poden descargar o impreso na páxina de Facebook do colectivo e entregalo, sempre antes desa data límite, a través do correo electrónico poetaavelinodiaz@gmail.com.

Nado en Santa Comba da Órrea no 1897, Díaz pasou boa parte da súa nenez en Meira, antes de emigrar a Bos Aires, onde exerceu o xornalismo. Alí desenvolveu unha intensa actividade cultural na Federación de Sociedades Galegas. Publicou catro volumes de poesía e, segundo o colectivo que pretende reivindicar a súa figura, deixou 851 poemas que fican inéditos.‘Debezos’, obra de 1947, está considerado o primeiro poemario en galego da posguerra.

Xosé Neira Vilas definía a Díaz como “o máis hábil versificador galego” e quixo presentar a súa candidatura para o Día das Letras no 2015. O vate riotortense e meirego morreu na capital arxentina en 1971, aos 73 anos de idade.

RIOTORTENSES E MEIREGOS, XUNTOS NA REIVINDICACIÓN

Diversas agrupacións de Riotorto e Meira apoian o esforzo da asociación cultural Avelino Díaz. Logo de recibir a negativa da RAG a incluír a Díaz nunha listaxe de candidatos, o colectivo decidiu emprender esta campaña de captación de sinaturas. En función do apoio recibido, trazará a estratexia a elixir para tentar conseguir o seu obxectivo.