Dous boletos do número 86.986, agraciado cun dos quintos premios no Sorteo Extraordinario de Nadal da Lotería Nacional, deixaron 12.000 euros en premios nas localidades de Becerreá e Castro de Ribeiras do Lea, no municipio de Castro de Rei.
En concreto, en Castro, o décimo premiado con 6.000 euros foi vendido en Casa Carreira, no número 4 da Praza García Abad. En Becerreá, foi o Café Bar O Noso onde caeu a sorte con outros 6.000 euros. O establecemento está situado na rúa Carlos III, número 37-39.
Este número, o 86.986, caeu bastante repartido e deixou fortuna nunha morea de localidades galegas.
A FABA DE OURO DE LOURENZÁ
Outro quinto premio, o do 19.371, tamén caeu na provincia de Lugo. Foi na Administración nº1 de Lourenzá, A Faba de Ouro, que repartiu 60.000 euros.
