A Garda Civil deitvo no marco da ‘Operación Malali’ a tres mozos, dous deles veciños de Lugo e un terceiro da localidade lucense do Corgo, como supostos autores dun delito de roubo con forza nas cousas perpetrado o pasado mes de abril nunha vivenda situada no municipio de Baralla, de onde os presuntos ladróns levaron uns 38.000 euros.
Segundo a investigación desenvolvida pola Garda Civil, os supostos ladróns aproveitaron a ausencia dos propietarios da vivenda, para acceder á mesma a plena luz do día. Para iso, escalaron até unha terraza, situada a un tres metros de altura.
Unha vez dentro, fixéronse coa citada cantidade de diñeiro,que se gastaron en días posteriores na compra de dous coches de gran cilindrada e en xornadas de lecer en diversos hoteis, entre outros gastos. A Garda Civil interveu os dous vehículos e o diñeiro en efectivo que aínda estaba en poder dun dos detidos.
Os vehículos foran postos a nome de terceiras persoas coa suposta intención de eludir responsabilidades xudiciais en caso de ser descubertos. A investigación segue aberta para recuperar a maior parte do diñeiro subtraído.
