O PSdeG na provincia de Lugo confía en manter o goberno da Deputación, tras as próximas eleccións municipais, ao estar “en moi boa situación” para “recuperar e gañar alcaldías”. Como presidente provincial os socialistas situarían de novo a Darío Campos.
Así o avanzou o secretario xeral provincial, Álvaro Santos Ramos, no marco do IV Comité, celebrado este sábado, no que os socialistas con representación na Deputación, o Parlamento, o Congreso, o Senado e o Parlamento Europeo, expuxeron o traballo desenvolvido ata o momento. “Os socialistas demostraremos con feitos que sempre estamos cos veciños. Os lucenses volverán gañar”, asegurou.
Álvaro Santos suxeriu que antes das eleccións municipais “van tratar de meter medo, de dividir, de enfrontar ou enganar con falsas enquisas”, pero replicou que se atoparán coa “unidade do PSOE e co apoio dos veciños“.
INVESTIMENTOS
No transcurso do acto, o presidente da Deputación, Darío Campos, deu conta do traballo dos últimos anos no ente provincial, pondo en valor o gasto de “máis de 230 millóns de investimentos desde 2016” e de “outros 50 millóns co orzamento deste ano”.
“O PSOE converteu á Deputación no motor económico e social da provincia. Lideramos a obra pública con case 90 millóns e con 30 millóns os plans de xeración directa de emprego”, reivindicou, ademais de apuntar que a entidade colaborou con “máis de 2 millóns co conxunto do tecido asociativo social da provincia”.
Para Campos, o PSOE pode sentirse “orgulloso” de “ser responsable da maioría das actuacións” que chegaron á provincia, como a construción “dunha rede pública de residencias e centros de día”.
Pero os socialistas tamén puxeron o acento nos avances impulsados desde o actual executivo de Pedro Sánchez, que confrontaron con “os últimos 7 anos” nos que “o PP non fixo absolutamente nada desde o Goberno Central máis que quitar dereitos”.
Así, os socialistas lucenses destacaron a subida das pensións, a inclusión da orixe do leite na etiquetaxe, as melloras na N-VIN, N-120, N-634 ou N-642 ou o impulso á Autovía da Mariña “pondo a exposición pública o proxecto”.
