Lugo rexistra no último reconto 531 casos activos de Covid máis ca na xornada anterior e alcanza as 7.214 persoas con infección activa na área sanitaria, tras sumar un total de 966 contaxios que foron rexistrados nas últimas 24 horas.
Vigo rexistra o maior incremento de casos, un total de 1.587; e séguelle A Coruña e Cee (+996), Pontevedra e O Salnés (+671), Santiago (+617), Lugo (+531), Ourense (+293) e Ferrol (+241).
AUMENTAN OS CONTAXIOS
Pola súa banda, os novos contaxios de Covid-19 aumentan no conxunto de Galicia a 8.614, e os casos activos están a piques de alcanzar a marca dos 70.000. Deste xeito, Galicia acumula desde o inicio desta pandemia 327.768 persoas contaxiadas por coronavirus, dos que 74.988 corresponden á área de Vigo; 69.500, á da Coruña; 49.402, á de Santiago; 41.184, á de Ourense; 39.003, á de Pontevedra; 33.899, á de Lugo; e 19.792, á de Ferrol.
Nas últimas 24 horas realizáronse 7.064 PCR, que eleva a 3.455.181 as feitas desde o inicio da pandemia; e 12.461 test de antíxenos, que suman 1.280.662, o que supoñen 19.525 probas efectuadas entre ambas. En canto á taxa de positividade en PCR –número de infeccións detectadas cada 100 test–, descende ata o 25,68%. Así, mantense moi por encima do limiar do 5% que fixa a Organización Mundial da Saúde (OMS) para dar por controlada a pandemia.