Os Mártires 1846
Foi polo mes de abril do século dezanove.
¡Un berro forte baril a toda patria conmove!
Solís en Lugo berrou un berro de rebeldía
¡Galiza enteira acorda!
¡O pobo enteiro se erguía!
Este poema é o que está nun mural da rúa San Roque de Lugo e que para o PP é motivo de denuncia por ser “independentista”. Trátase dun poema do gran poeta lucense, Manuel María, homeaxeado cun Día das Letras Galegas en 2016. E está adicado á gran revolta de 1846 protagonizada polo coronel liberal Miguel Solís.
E agora, estas letras son motivo de disputa política por parte dos populares que o consideran unha “pintada independentista”. Por iso, de “ataque agudo de ignorancia”, cualificou Lugonovo a reacción do Partido Popular e de Ciudadanos sobre este mural. “Desautorízase así mesmo quen descoñece a propia historia de Lugo e a importancia que esta cidade tivo nas loitas do século dezanove pola liberdade”, lamentou o seu candidato Xosé Chorén.
“Ademais, atreverse a cuestionar a un grande das letras como Manuel María é simplemente negar a nosa cultura e poñerlle paus nas rodas á nosa lingua, un comportamento que, por outra banda, non nos sorprende tendo en conta de quen vén”, engade o candidato de Lugonovo ás vindeiras eleccións municipais.
A formación amosa o seu apoio á liberdade creativa e de expresión “e, sobre todo, á cultura sen corsés” especialmente cando, “coma neste caso, como xa referiu o goberno local, a actuación conta con todos os permisos pertinentes”, conclúe Chorén Vázquez.
A polémica iniciouse tras denunciar, primeiro C’s nas redes sociais, e logo o PP, que este era un mural “independentista”. De feito, os populares mesmo vincularon este mural con motivos prohibidos pola Constitución. Unhas denuncias que coinciden coa situación que se viven en Euskadi e en Cataluña e que son as mesmas que realiza o seu líder, Pablo Casado, o de Ciudadanos, Alber Rivera e o de Vox, Santiago Abascal, defendendo a “españolidade” para enfrontarse aos independentistas.
