Acabas de acadar o récord de España de natación na modalidade de 200 metros bolboreta. Como te atopas e cales son as túas vindeiras citas no teu propio calendario?
Atópome moi ben e moi ledo cos resultados que estou a ter. O meu vindeiro evento é o campionato galego, que vai ser en A Cañiza.
Agora mesmo, tes 28 anos. Cando xurde a túa paixón pola natación? Cando comezas a adicarte a ela?
Comecei a nadar aos catro anos. A partir de aí, comecei a nadar co meu pai, que foi quen me ensinou. Comecei a competir aos quince anos.
Cales foron as túas sensacións ao acadar o récord de España en 200 metros bolboreta?
A sensación foi moi boa. Acadeino no campionato de España.
Cales son os teus vindeiros obxectivos?
O meu obxectivo, obxectivo sería ir aos Xogos Olímpicos de 2020 en Tokio.
En que disciplinas tes a idea de competir?
Agora mesmo aínda non o sei.
Como te describirías como deportista?
Son un deportista, sobre todo, resistente, con moita forza e son un apaixonado do que fago.
Cales son os teus referentes, os teus ídolos?
Michael Phelps, Mireia Belmonte, Iván Raña e Javi Gómez Noya. A Iván e a Javi coñézoos persoalmente.
Onde adestras a cotío?
En Lugo, no Club Fluvial.
Como é o teu día a día? Cantos días adestras á semana? Cal é o teu horario?
Adestro os luns e os mércores e, logo, os fines de semana, que é cando teño máis tempo libre. Os fines de semana fago dobre sesión, é dicir, primeiro vou ao ximnasio e despois vou á piscina.
Ao marxe da natación, cales son as túas outras paixóns?
Ao marxe da natación, gústame moito o teatro, encántame. Incluso, gústame máis o teatro que a natación.
Quen é o teu referente no teatro?
Luís Tosar.
Que aportan a natación e o teatro na túa vida diaria?
Apórtanme todo a nivel persoal de xeito normal e natural.
Ti es lucense. Segues a outros equipos e deportistas da cidade?
Son aficionado do Breogán. Antes, ía a case tódolos partidos. Agora non vou, aínda que me gusta moito, porque a natación absórveme moito tempo e non podo. Pero sigo sendo afeccionado do Breogán, claro.
