A Deputada de Réxime Interior, Promoción do Territorio e Turismo, Pilar García Porto, participou na posta en marcha da sexta edición das Rutas polo Románico da Deputación, que arrancaron este venres na Catedral de Lugo e se desenvolverán ao longo de todo o mes de maio por distintos concellos da provincia. A institución provincial promove estas visitas gratuítas para poñer en valor o importante patrimonio románico lucense coincidindo co Día da Transrománica, que se celebra o 9 de maio.
Pilar García Porto subliñou que a programación deste ano “inclúe 16 rutas gratuítas con 325 prazas, que permitirán descubrir catorce xoias do románico europeo en territorio lucense”. As persoas que queiran participar, aínda poden anotarse en: https://inscricions.deputacionlugo.org/
A Deputación de Lugo integra desde 2021 a rede Transrománica, un Itinerario Cultural Europeo recoñecido polo Consello de Europa que agrupa territorios de varios países europeos.
