A Deputación de Lugo vén de iniciar o estendido de aglomerado nas obras do firme que afectan a diferentes tramos de tres vías ao seu paso polos concellos do Saviñao, Pantón e Monforte de Lemos. Unhas obras nas que a institución provincial inviste 118.000€ e que está a executar a empresa FEVISA Vía e Obras SL. O proxecto abrangue actuacións de mellora do firme e da sinalización horizontal nas estradas LU-P-4102, LU-P-3202 e LU-P-3208, tres vías de relevancia para a mobilidade da zona sur da provincia e para a conexión entre parroquias e núcleos de poboación da Ribeira Sacra.
No caso da LU-P-4102, que comunica Ferreira con Currelos e enlaza a N-120 coa LU-611 á altura de Escairón, a Deputación actúa na mellora de preto dun quilómetro de firme a partir do punto quilométrico 12. Ademais, procederase á reposición das marcas viarias entre os puntos quilométricos 6,165 e 11,020. O proxecto contempla tamén a rehabilitación por tramos da LU-P-3202, entre Monforte de Lemos e O Saviñao, por Currelos. E da LU-P-3208, que une Seoane con Pol pasando por Cinsa.
