O Concello de Rábade presenta a súa programación para o 8 de marzo, Día Internacional da Muller, con actividades dirixidas a toda a poboación.
O programa dará comezo o xoves 5 de marzo coa presentación ás 11:00 horas no Centro Sociocultural do xogo ‘Feminismos no tempo’. Trátase dun obradoiro para xogar e aprender feitos e mulleres relevantes da historia. Proponse unha actividade para a poboación en xeral (a partir dos 16 anos) para xogar, dialogar e reflexionar.
Ese mesmo día pola tarde haberá un contacontos para público familiar (+5) a partir das 18:00 horas no Centro Sociocultural. Baixo o título ‘A máquina do tempo das científicas’ viaxaremos ao pasado para coñecer mulleres extraordinarias.
Presentación dun libro
O xoves día 12 de marzo o Centro Sociocultural acollerá a presentación do libro ‘Alma de grilo’ de María García ás 19:00 horas, un acto pensado para o público xeral. A autora fará unha presentación teatralizada acompañada da guitarrista Icía Saavedra.
Por último, o luns 16 de marzo haberá obradoiros coeducativos no CEIP Otero Pedrayo de Rábade dirixidos ao alumnado de 3º e 4º de Primaria nos que se vai promover a reflexión sobre os estereotipos presentes nos medios e na vida diaria, fomentando unha mirada crítica e coeducativa.
As actividades enmárcanse no programa Rábade en igualdade e están cofinanciadas polo Pacto de Estado contra a Violencia de Xénero.
