A manifestación feminista unitaria terá Lugo como escenario o vindeiro 3 de marzo. Así o decidiu a asamblea de Galegas 8M, valiando o formato itinerante desta convocatoria. Será o preludio da Folga de Mulleres do 8 de marzo.
A reunión a nivel galego recolle o espírito do paro organizado do 2018. Galegas 8M reanudou as xuntanzas dende finais do ano pasado, celebrando senllas asambleas en Cambre e Allariz, esta última o 12 de xaneiro. Así se acadaron os primeiros acordos, que comprenden, ademais da data e o lugar da manifestación feminista unitaria, o lema Por todas as mulleres, por todos os dereitos: revolta feminista.
Como anunciou a plataforma, coordinaranse rutas de transporte colectivos cara a Lugo con motivo da manifestación feminista unitaria. Os grupos de traballo de Galegas 8M desenvolverán todo o necesario, e convidan a todas as mulleres que queiran participar da organización a contactar a través das redes sociais ou no enderezo 8m2018@gmail.com.
8M, Folga de Mulleres
O propio 8 de marzo convocarase de novo a Folga de Mulleres nos eixos laboral, estudantil, de coidados e de consumo, informou a plataforma. Organizarase a nivel local con asembleas e xuntanzas abertas en diversas localidades.
Precisamente, Galegas 8M formouse en decembro de 2017 a prol dun Día das Mulleres a nivel galego “o máis diverso, horizontal e inclusivo posible”. A asemblea inclúe ducias de colectivos, plataformas e organizacións feministas e mulleres a título individual; ten carácter itinerante, realizando as xuntanzas en distintos puntos de Galicia.
