Natxo Lezkano, adestrador do Cafés Candelas Breogán, compareceu en rolda de prensa previa ao partido contra MoraBanc Andorra este sábado no Pazo dos Deportes de Lugo a partir das 20:30 horas na decimoterceira xornada da Liga Endesa.
O adestrador breoganista afirmou que “cada vitoria ten un valor moi alto”.
MoraBanc Andorra, segundo Lezkano, é “un equipo que medrou ao longo destes anos de xeito lineal e non deixou de medrar dende a LEB Prata até colocarse en Europa, é un exemplo para otros clubes” coma Breogán. Opinou que ten “xogadores moi físicos, xogadores que coñecen ben a liga, coñécense entre eles, xa levan tempadas xogando xuntos moitos deles”, ten unha “traxectoria un tanto irregular na liga”, “tocoulles un calendario complicado” e “está tendo un bo rendemento nos partidos fóra da casa”, polo que será “un partido moi difícil” e “están a xogar para a Copa”. Lembrou que foron “capaces de gañarlle ao Real Madrid e perder contra GBC” e subliñou que contra o Madrid cunha “anotación altísima e iso fala moito do seu potencial”. Valorou que é un conxunto que “corre moitísimo, anota sinxelo a pesar de non estar a ter moi boas porcentaxes polo de agora”, “xoga a un ritmo moi alto” e “unha das claves, que van ser bastantes, pasa polo seu xogo de contraataque, primeiros segundos de posesión, peche do rebote, carga moi ben o rebote ofensivo.”
O técnico nado en Portugalete reflexionou que Alijah Millsap, novo aleiro do Breogán e que chegou hoxe pola tarde, “é bastante completo, pode anotar por diferentes vías, é físico, xoga ben situacións de un contra un, pode incluso postear, tira ben sen ser un tirador, non descoida a faceta defensiva e vai ben ao rebote”, “non ten moita experiencia en Europa” e “vai ser clave a súa adaptación”. “É unha posibilidade, lóxicamente ao non adestrar é difícil que poida entrar na rotación”, respondeu sobre o partido do sábado.
En canto ás baixas, contestou que Emir Sulejmanovic “aínda non adestrou co grupo, é difícil que chegue ao partido, Sergi Vidal non adestrou”, pero confía “que poida chegar”, mais ten “molestias no tendón de Aquiles” e con Ricardo Úriz “non” cre que poidan “contar até 2019.”
