Cafés Candelas Breogán perdeu na súa visita a Unicaja Málaga (78-72) na oitava xornada da Liga Endesa.
O partido comezou igualado (10-10 na metade do primeiro cuarto), pero con Jaime Fernández, máximo anotador final do encontro con 24 puntos, Unicaja comezou as súas primeiras vantaxes.
O acerto de Aleksandar Cvetkovic e o sempre fiable Jerome Jordan axustaron as diferenzas no segundo cuarto (29-26). Pero Jaime Fernández foi novamente decisivo para ampliar a vantaxe local ao descanso (39-28).
Xa no derradeiro cuarto, dúas triplas de Lucio Redivo achegaban ao Breogán (59-54). Nos derradeiros intres, Jaime Fernández anotou catro tiros libres. Os lucenses tiveron as súas opcións cunha tripla errada por Alec Brown, así como nunha contra na que os galegos cometeron falta en ataque.
O Breogán foi competivo ata o final, nunca se foi do partido, estivo fantástico no rebote ofensivo, pero amosou novamente excesivo desacerto exterior.
Volodymyr Gerun foi o breoganista máis valorado ao aportar 16 puntos e 9 rebotes para 27 puntos valorativos.
