Regresei a Lugo no 2015 despois de once anos fóra da miña cidade, e na miña volta atopei un espazo fantástico para seguir facendo amigos de todo o mundo e ao mesmo tempo seguir practicando idiomas como nos meus anos no estranxeiro.

Daquelas o intercambio estaba coordinado polo seu fundador, o inglés Neil Wykes, unha persoa excepcional que durante moitísimos anos dinamizou a comunidade internacional lucense.

Para min foi unha base estupenda, nos primeiros anos asistín con moitísima frecuencia e agora sigo indo sempre que podo para empaparme do bo ambiente que sempre se sinte nestes encontros.

Actualmente é Rami Salmo, veterinario e investigador sirio no Campus Terra, quen coordina e organiza, como sempre cada martes ás 21h30 (actualmente celébrase no Santuario de Magnus, na Praza do Campo), o Lugo Language Exchange (@lugo_language_exchange en Instagram). Vale a pena descubrilo! Un lugar e un momento semanal imprescindible na axenda cultural da cidade.