O festival de Pardiñas, na localidade de Guitiriz, segue sumando atractivos para visitalo e coñecer algo máis das moitas vertentes da cultura galega. A Asociación de Gaiteiros Galegos vén de anunciar que, un ano máis celebrará a Mostra de Instrumentos de Música Tradicional, e que terá lugar os días 6 e 7 de agosto no amentado lugar.
A cita congregará preto de 30 artesáns que amosarán ao público a riqueza da produción artesanal dos instrumentos que saen dos seus talleres. Consagrada como “a máis antiga e importante da Península Ibérica”, a mostra de Instrumentos de Música Tradicional contará cunha ampla variedade de bens; como gaitas, requintas, zanfonas, tambores, bombos, pandeiretas, pandeiros e demais.
Dende a AGG celebran o regreso á normalidade deste 2022. “Os dous derradeiros anos foron complexos por mor da Covid 19, pero conseguimos manter a celebración da mostra nos casetos da feira de Parga aínda que reducindo a un día a súa celebración. Nesta edición, despedímonos con agarimo de Parga, e volvemos a Pardiñas, para amosar o traballo dos magníficos artesáns e artesás participantes”, inciden.
