A Comisión Permanente do Consello Xeral do Poder Xudicial (CGPJ) aprobou manter, polo menos ata final de ano, o reforzo na sección primeira da Audiencia Provincial de Lugo, consistente nunha comisión de servizo, sen relevación de funcións, a favor de Sandra María Piñeiro Vilas, titular do Xulgado de Instrución número 2 de Lugo.
Segundo informa o Tribunal Superior de Xustiza de Galicia (TSXG), a maxistrada asumirá entre 12 e 15 relatorios ao mes en materias que non sexan cláusulas solo. A sección primeira, ademais, conta con outra comisión de servizo, sen relevación de funcións, a favor de José Luís Deaño Rodríguez, titular do Xulgado de Primeira Instancia número 5 de Lugo.
O informe elaborado polo Servizo de Inspección do CGPJ revela que a media de entrada de asuntos da sección excedeu o indicador do CGPJ nun 164%, en 2019; nun 126%, en 2020; e nun 155 %, no primeiro trimestre de 2021. Por outra banda, o rendemento medio deste órgano foi do 111%, en 2019; do 125%, en 2020; e do 122%, no primeiro trimestre de 2021.
O nivel de pendencia da sección, a 31 de marzo deste ano, foi de 825 asuntos, superior á media de Galicia (532), pero inferior á estatal (835). O tempo de resposta nesa data situouse en 10,67 meses, superior á media galega (6,6) e á estatal (7,6). Nesa data o órgano non tiña asuntos sen incoar e contaba con 27 sentenzas pendentes de ditar, 19 de menos de tres meses de antigüidade; sete, de entre tres e seis meses; e unha, de máis de seis meses.
