Cafés Candelas e Club Baloncesto Breogán asinaron esta mañá o acordo de patrocinio para a tempada 2018-2019 nun acto celebrado na sede da empresa lucense, en O Ceao. A marca seguirá dando nome ao club. Será a cuarta campaña consecutiva que Cafés Candelas patrocine ao equipo breoganista, é dicir, dende a tempada 2015-2016. De feito, Cafés Candelas expresa a “enorme satisfacción de acompañar ao Breogán e a súa espectacular afección no camiño cara a elite”. O Breogán xa superou os 4000 abonados para a Liga ACB 2018-2019.
Andrés Alonso, directivo de Cafés Candelas, subliña que “confía plenamente na plantilla, no equipo técnico e na directiva”, así como “a afección, esa marea celeste que da mostras día a día de estar ao más alto nivel”.
A empresa lucense asegura que “apoiou ao club celeste para cumprir as condicións que esixe xogar na Liga Endesa ACB”. Explica que “colaborou na captación de novos fondos”.
Suso Lázare, presidente do Club Baloncesto Breogán, agradeceu que Cafés Candelas estivo “nas malas e nas duras”, así como subliñou o “orgullo de contar con ela”. “Sei que para Candelas é un esforzo”, afirmou.
Cafés Candelas adiantou que “desenvolverá unha serie de actividades de dinamización do club celeste e da súa afección” e nunha “serie de novedosas iniciativas”.
Cafés Candelas tamén patrocina a Durán Maquinaria Ensino Lugo, equipo que xogará na máxima categoría do baloncesto feminino español a vindeira tempada.
