EFE | As rúas de Vilalba enchéronse esta mañá de persoas que quixeron amosar o seu apoio ao sector hostaleiro, pechado como consecuencia das restricións da pandemia. A manifestación, convocada pola asociación de empresarios Sete Pontes, reuniu unhas 200 persoas. 

“Non somos culpables“, “Salvemos a hostalaría”, “Queremos traballar”, “Pechamos sen axudas” ou “Necesitamos traballar” foron algunhas das mensaxes que se podían ler nos carteis dos manifestantes. Os hostaleiros queixáronse da difícil situación que están atravesando, sen ingresos e cunhas axudas “que non acaban de chegar”.

A esta protesta sumouse a maioría do comercio local, que pechou as súas portas entre as 11:00 e as 12:00 en solidariedade co sector hostaleiro.

VIVEIRO SAE DO CONFINAMENTO

Vilalba é un dos tres concellos de Lugo que permanece pechado perimetralmente e coa actividade da hostalería local clausurada de forma temporal, xunto coa propia capital lucense e Burela. Esta semana, as autoridades sanitarias permitiron a apertura de Viveiro e Monforte de Lemos.