EFE | A corporación de Lugo aprobou por unanimidade, nun pleno extraordinario celebrado este venres, destinar 12 millóns de euros dos remanentes municipais á estratexia Lugo Transforma. Trátase de crear un fondo de capital risco para apoiar proxectos empresariais que xeren “impacto” económico e social no municipio.
A Estratexia Lugo Tranforma articularase, segundo informou o goberno local de Lugo, a través da entrada temporal do Concello no capital de proxectos empresariais innovadores. Precisou que deberán ser proxectos de “alto valor engadido”, tanto de empresas medianas ou pequenas como de nova creación, pero sempre con “potencial de crecemento e con alta capacitación” en sectores que xeren un alto “impacto social e ambiental”.
“Falamos de enerxías limpas e sostibles, de bioeconomía circular, biotecnoloxía, farmacia, novas tecnoloxías, servizos avanzados á industria e I+D+i, entre outros. Quedan excluídos os sectores inmobiliario e financeiro”. Ademais, esta iniciativa estará aberta á “participación doutros investidores, tanto públicos como privados”.
CONTROL DA OPOSICIÓN PARA EVITAR “CHIRINGUITOS”
Pola súa banda, o portavoz do Partido Popular, Ramón Carballo, asegurou que o apoio do seu grupo a esta iniciativa non é “un cheque en branco” para o goberno local e asegurou que a oposición vixiará que se faga un bo uso dese diñeiro, para que non se destine a financiar “chiringuitos”. EFE
