A Garda Civil desarticulou unha organización criminal que cometía roubos con forza en instalacións mineiras de varias provincias de España, entre elas Lugo e A Coruña. Entre os detidos hai dous veciños de Meira, de 35 e 38 anos de idade, así como unha muller de 40 anos de Friol. Impútanselles delitos de roubo, falsidade documental e pertenencia a grupo criminal.
A operación policial iniciouse no verán do 2019 tras detectar un aumento de casos de sustracción de pezas que forman o sistema hidráulico e o sistema de mando das máquinas escavadoras utilizadas fundamentalmente no interior de canteiras.
A banda realizaba unha planificación previa da contorna do lugar, horarios da explotación e sistema de seguridade. Cada integrante desenvolvía un cometido, cun alto grao de preparación. Dispoñían dunha loxística operativa pensada para establecer unha estancia temporal nos lugares nos que pretendían roubar, así como lugares para ocultar as pezas sustraídas e que logo trasladaban ao seu destino final en vehículos con matrículas estranxeiras a nome de terceiros.
No marco da operación puidéronse recuperar pezas de retroescavadoras por un valor de 290.000 euros. Foron devoltas aos seus lexítimos propietarios. As persoas detidas foron postas a disposición xudicial.
