A área sanitaria de Lugo presenta este luns 2 de novembro un total de 983 casos activos, tres menos ca na xornada anterior. A isto axudaron as 41 altas diagnosticadas e o notable descenso dos novos positivos detectados nas últimas 24 horas: confirmáronse 39 novos contaxiados, mentres que o sábado e o domingo esta cifra superaba o centenar.
Cómpre analizar estas cifras con cautela, posto que a baixada no total de casos activos podería deberse ao ‘efecto fin de semana’ e ao menor número de probas realizadas durante estes días.
En canto á presión asistencial, hai 38 persoas con Covid-19 hospitalizadas na provincia (+1 respecto do día de onte). Delas, 33 están a ser atendidas en planta e cinco permanecen na UCI (+1). Por outra banda, o número de falecidos ascende ata os 98 tras finar recentemente dúas usuarias dunha residencia na Mariña.
CONCELLOS EN ALERTA
A Consellería de Sanidade tamén trasladou o mapa ‘semáforo’ da incidencia do coronavirus por concellos. Así, na provincia lucense, os municipios que manteñen a alerta vermella son Lugo, A Fonsagrada, Cervo, Viveiro e Monforte de Lemos.
DATOS EN GALICIA
Segundo a Consellería de Sanidade, no conxunto da comunidade galega os positivos por Covid-19 confirmados por PCR nas últimas 24 horas descenderon a 597. Son case 200 menos que os contabilizados diariamente durante o pasado fin de semana -775 o domingo e 755 o sábado-.
Desde o inicio da pandemia en Galicia contaxiáronse 37.966 persoas e faleceron 923. Podes ler máis información no Galicia Confidencial.
