O central portugués Luís Miguel Vieira Silva foi presentado como novo xogador do Club Deportivo Lugo para as vindeiras tres tempadas. Emilio Viqueira, director deportivo do club, confirmou que houbo un “traspaso” para a súa fichaxe cun “custo”.
Miguel Vieira amosouse “moi contento” polo interese do Lugo e “feliz” de fichar polo equipo albivermello. “Agradezo o seu empeño e determinación“, destacou.
O central luso explicou que xoga coa perna “dereita e coa esquerda con moita facilidade”. Comentou que é “moi forte, moi poderoso no xogo aéreo”. “Nunca dou un balón por perdido”, resumiu.
Por outra banda, asegurou que os compañeiros estanlle “axudando moito”.
Tamén, contestou que en Portugal “houbo clubes interesados, pero o fútbol portugués non está moi ben financieiramente”.
Miguel Vieira, de 27 anos e 1.90 metros, procede do F.C. Paços de Ferreira, onde xogou 32 partidos a tempada pasada na Primeira Liga portuguesa, a máxima categoría en Portugal, marcando 4 goles. Acumula 55 partidos na Primeira Liga de Portugal.
