Outras tres mortes en hospitais galegos, dúas delas ligadas ao brote da residencia DomusVi de Outeiro de Rei e a terceira á residencia Orpea de Culleredo, elevaron a 710 as vítimas mortais en Galicia diagnosticadas con COVID-19 desde o inicio da pandemia.
En concreto, as autoridades sanitarias galegas informaron este sábado de que perderon a vida un home de 93 anos ingresado no hospital privado Polusa de Lugo e unha muller de 85 que permanecía no Hospital Lucus Augusti (HULA). Ambos tiñan patoloxías previas e eran usuarios do centro de Oteiro de Rei, que rexistra un brote con 136 casos.
91 FALECIDOS NA ‘NOVA NORMALIDADE’
Desde o comezo da ‘nova normalidade’, o número de pacientes falecidos coa enfermidade en Galicia é de 91, tras a morte dunha muller o 7 de agosto. É dicir, están morrendo desde ese día máis de dúas persoas por día.
Antes diso, Galicia encadeara case dous meses –desde o 10 de xuño– sen decesos relacionados co coronavirus. Este mércores, Galicia superaba os 700 falecidos. O maior balance de mortos dos últimos meses notificouse o pasado mércores, cando Sanidade informou dun total de sete. A última vez que se superou esta cifra foi o pasado 5 de maio, con nove decesos.
