O 17 de agosto pasará a ser o día na lembranza dos galegos represaliados polo Franquismo a nivel oficial. Así o expresaron a vicepresidenta da Deputación lucense Maite Ferreiro e o deputado de Memoria Histórica Efrén Castro na presentación dun acto previsto para o vindeiro luns 17. A devandita xornada terá lugar na honra e a lembranza dos “mártires de Galicia”, unha efeméride que podería converterse en oficial.
Na presentación do acto, o deputado de Memoria Histórica Efrén Castro avogou pola “institucionalización do 17 de agosto como Día da Galiza Mártir para lembrar a todas as persoas asasinadas e perseguidas polo franquismo en Galiza e homenaxear a Alexandre Bóveda”. A conmemoración do Día da Galiza Mártir foi instaurada en 1942 en Bos Aires polos galegos no exilio na honra de Alexandre Bóveda, fusilado polos fascistas na Caeira, en Poio, no 1936.
Neste sentido, o deputado incidiu na “necesidade de desenvolver política públicas dirixidas ao coñecemento da nosa historia e ao fortalecemento dos valores democráticos, para proporcionar verdade, xustiza e reparación a todas as vítimas da represión e as súas familias”.
De xeito paralelo, lembrou que “segue pendente a localización de persoas asasinadas, a anulación das sentenzas ditadas polas tribunais fascistas, a devolución de bens expoliados, a retirada de honores e recoñecementos públicos aos verdugos e o enxuizamento dos delitos contra os dereitos humanos que se produciron durante o franquismo”.
O ACTO
O acto institucional do vindeiro luns terá lugar na localidade de Sarria e comezará cunha ofrenda floral no de Santa Mariña, a carón da placa que lembra ás vítimas do franquismo na comarca, ás 20:00 horas. A continuación, o historiador Rafael García Ferreira pronunciará unha conferencia baixo o título “O golpe do 36: violencia e perspectiva nacional”. A música de Raiceira acompañará a intervención.
