O Club Deportivo Lugo confirma a Juanfran García como o novo adestrador do equipo albivermello para o que resta de tempada. O valenciano substituirá a Curro Torres, destituído do posto de técnico a seis partidos do remate da competición.
O técnico valenciano terá o primeiro contacto co cadro de xogadores no adestramento desta tarde no Anxo Carro, só un día antes dun partido decisivo contra o Numancia. Con el, o CD Lugo suma tres adestradores durante o curso 2020/21, un período que iniciou con Eloy Jiménez á fronte.
Juanfran García non conta con experiencia dirixindo a equipos de primeiro nivel, pero xogou como futbolista profesional en equipos como o Levante, o Valencia, o Zaragoza e o Celta. Neste último club formou parte do seu staff técnico durante a pasada tempada. Ademais, García tamén xogou en equipos estranxeiros (Besiktas, Ajax ou AEK Atenas), foi internacional absoluto en España en once ocasións e Campeón de Europa sub21.
