Obreiros de Alcoa San Cibrao e empresas auxiliares cortan arestora, desde as 11:00 horas deste venres, o tráfico en ambos os sentidos da circulación na A-8, no quilómetro 576, ao seu paso polo municipio lucense de Vilalba. Centenares de traballadores concentrábanse á altura da rotonda de Santaballa, onde a Autovía do Cantábrico conecta coa AG-64, que comunica a vila chairega con Ferrol.
Como nas últimas accións de protesta organizadas polo comité de empresa, os traballadores formaron barricadas con rodas, ás que logo prenderon lume.
O comité de empresa segue coas súas accións de protesta para esixir a continuidade da produción e dos empregos na planta de aluminio, onde a multinacional presentou un Expediente de Regulación de Emprego (ERE) que suporía o despedimento de ata 534 obreiros e de alomenos outros 400 de empresas auxiliares.
