A área sanitaria de Lugo non presenta grandes novidades neste xoves 4 de xuño. Os casos activos por coronavirus seguen baixando paulatinamente e, segundo a Consellería de Sanidade, hoxe contabilízanse 38 positivos, un menos ca na xornada de onte.
Non hai cambios nos datos dos hospitais, onde só unha persoa permanece ingresada no Hospital Universitario Lucus Augusti. O resto de centros da provincia seguen libres de COVID-19, así como as Unidades de Coidados Intensivos. Outras 37 persoas están a ser atendidas nos seus domicilios.
Respecto do histórico de datos, o Sergas refire 884 altas e 28 falecementos a fío da pandemia. O último foi o dunha muller de 76 anos que finou na unidade de críticos do HULA o pasado martes.
GALICIA
Os datos oficiais para o conxunto galego indican 569 casos activos, o que supón unha baixada de 109 respecto do día de onte. Unha única persoa continúa na UCI e outras 23 están ingresadas en planta. O Sergas documentou 10.148 persoas curadas e 618 falecementos (+1).
